Ah-Hua
Thai-Familiebeiz am Helvetiaplatz mit grosse Portione zu fairne Priis. De Bestseller isch de Yam Wunsen, de Glasnudlesalat mit Crevette. Insider-Tipp: Pad Pattaya Gai.
Who is Who: alli Ort uf em Rug Life Züri Teppich
Zum Alte Löie
Ächti Quartierbeiz mit eme riesige Garte under alte Böim. Gchochet wird regional und saisonal, alles huusgmacht bis zur letschte Sauce. Unbedingt s Muotathaler Tatar probiere und am beschte grad alles zum Teile bstelle.
Amboss Rampe
Früener Polizeiross-Stall, Lager und Autowerkstatt, hüt Bar mit Graffiti-Fassade a de Zollstrass. Drinne stönd alti Werkstatt-Möbel und e riesigi Discokugle. Am Sunntig gits Brunch.
Arena Cinemas Sihlcity
18 Kinosääl im Sihlcity. Im 4DX wackled t Sitz und es windet, rägnet und blubberet. Mit Chindergeburtstäg und Family-Wuchenänd.
Ayverdi's
Zürcher Kebab-Familiebetrieb sit 2002, agfange z Affoltere. Nur Fleisch vo Schwiizer Puure, zwei Mal am Tag frisch gliferet. Unbedingt de Trüffel-Kebab und t Trüffel-Pommes probiere.
Bäckeranlag
T Bäcki isch de Volkspark vom Chreis 4, mit Spielplatz und Planschbecki für di Chline. Und drü Bronze-Zebras, wo vill Lüüt für Ross halted.
Bärg 8044
Es Restaurant ohni Dach, zmitzt uf de Wiese am Züribärgwald. Alles chunnt vom Holzchohlegrill und wird a lange Holztisch zum Teile serviert. Nur bi schönem Wätter offe, drum: Sunne gseh, ufe gah. Nächschti Saison ab Mai 2027.
Barry's
S erschte Barry's ide Schwiiz, im Huus zur Katz. Trainiert wird im berüehmte Red Room, wo meh nach Club als nach Gym usgseht. Nachher gits en Protein-Shake a de Fuel Bar.
Bohemia
Quartier-Bar am Chrüzplatz für de Apéro, es eifachs Znacht oder en Drink. Am Wuchenänd en grosse Brunch mit Pancakes und Bagels, am beschte reserviere. Am Abig Angus-Steaks vom Grill.
Botanische Garte
Rund 7'000 Pflanzenarte und de Iitritt isch gratis. Drü Glaskupple mit Tropewald, Subtrope und Savanne, und Aquarie mit Fisch us Afrika, Südamerika und Asie. Di Chline liebed das.
Campo
De Treffpunkt am Helvetiaplatz in eme Betonbau us de 60er. Huusgmachti Pasta und Pizza, au in Mini-Portione für de chlini Hunger. Vom Morge-Espresso bis zum Aperitivo mit Blick uf de Helvetiaplatz.
Casa Ferlin
Sit 1907 e italiänischi Familiebeiz und eis vo de ältischte Restaurants vo Züri. Berüehmt für di huusgmachte Ravioli und t Mousse au Chocolat. Venezianischs Ambiente mit Sidetapete und Goldrahme.
Chinderspital Züri
S neue Kispi vo Herzog & de Meuron, baut für Chind: Notfall-Theke uf Chinderhöchi, Bullauge-Fänster und Spielnische mit Bilderbüecher. Jedes Zimmer hät es Bett für Mami oder Papi. Merci a alli, wo det schaffed.
Cinque
Italiänisch wie bi de Nonna: jede Tag frischi, huusgmachti Pasta, es Interieur voller Antiquitäte und alte Schwarz-Wiiss-Fotene, romantischs Liecht. Tipp: Pappardelle mit Wildschwiiragout. Im Summer uf de Terrasse a de Langstrass.
Zirkus Conelli
De Wienachtszirkus uf em Bauschänzli, jede Advent sit über 30 Saison. Akrobatik, Comedy und Live-Musig für chlini und grossi Gäscht, ohni Tier. Saison bis 31. Dezämber.
Coop Bahnhofsbrugg
De Coop grad a de Bahnhofsbrugg, zwüsched HB und Central. Da holsch Brot, Früchte und en Znüni, bevor s ad Limmat oder uf de Zug gaht.
Didi's Fride
Zwänzg Jahr lang eini vo de feinschte Adresse vo Züri, mit 15 GaultMillau-Pünkt und acht Zmittag-Menüs statt enere Charte gsi. Ändi September 2026 hät de Didi t Türe zuegmacht. Gschlossä, aber für immer i oisne Herze.
The Dolder Grand
S Märlischloss über Züri sit 1899. Ufe gahts am schönschte mit de Dolderbahn. 175 Zimmer und Suite und es Spa mit 4'000 m².
DRAFT. Coffee
Specialty Coffee im Seefeld, sit 2024. Näbem Kafi gits Matcha und huusgmachte Jamu. Under de Wuche Zmorge und Gebäck, am Wuchenänd en grosse Brunch.
Kafi du Bonheur
S Kafi mit französischem Charme am Bullingerplatz. Sunneterrasse, drü Zmittag zur Uswahl, Sunntigsbrunch und am Abig französischi Chuchi mit em passende Wii. Und im Chäller wartet en alte Flipperchaste.
Seebadi Engi
Holz-Seebadi mit Blick über de See bis id Alpe. Im Winter wirds zur Sauna am See: ufwärme und nachher in chalte See gumpe. Mit Kiosk, Bar und SUP-Vermietig.
ETH Züri
Baut vom Gottfried Semper und 1864 fertig worde, t Kupple isch es Wahrzeiche vo Züri. Vo de Polyterrasse häsch eine vo de beschte Blick über t Altstadt. S Hauptgebäude isch öffentlich zuegänglich.
Kafi Europa
Am Tag es Kafi, am Abig Bar mit DJs vo Dunschtig bis Samschtig. Holz, Läder und Marmor, Terrasse uf beidne Siite und am Wuchenänd Brunch mit French Toast und Turkish Eggs. Am Samschtignamittag: Oysters, Beats & Bubbles.
Fat Tony
Pizza-Bar a de Langstrass im 70er-Miami-Look mit verstecktem Innehof. Wildi Pizza-Kreatione und grosszügigi Slices. De perfekt Start in en Abig oder als Ändi vomene Abig.
Flohmi Bürkliplatz
Vo Mai bis Oktober jede Samschtig direkt am See. Über 230 Ständ mit Antiquitäte, Vintage und Kunscht. De gröscht Flohmi vo Züri, sit über 50 Jahr.
Flohmi Kanzlei
Jede Samschtig uf em Kanzlei-Areal im Chreis 4, de farbigscht Flohmi vo Züri. Platte, Schmuck, alti Kameras und Secondhand-Mode. Und di z chlii wordene Chinderski vom letschte Winter.
Flughafe Züri
De gröscht Flughafe vo de Schwiiz. Uf de Zuschauerterrasse B gits de Mini-Airport und en Spielplatz, es Paradis für Kids. Flüüger luege gaht immer.
Frau Gerolds Garte
De Stadtgarte im Chreis 5 sit 2012. Im Summer Gartebeiz und Grill, im Winter Fondue, Raclette und heissi Schoggi am Füür. Für di Chline gits Kids Disco, Keramik-Male, Jöggeli Chaschte und Pingpong. Und e Gelateria di Berna hätts au no.
Frauebadi Stadthuusquai
S Jugendstil-Frauebadi zmitzt ide Limmat, vis-à-vis vom Fraumünschter. Am Tag nur für Fraue. A drü Abig pro Wuche wirds zur Barfuessbar für alli.
Fraumünschter
Gründet 853, berüehmt für di foif Chagall-Fänster im Chor. Jedes Fänster hät sini eigeni Farb und Gschicht. Dezue t Orgle mit 6'959 Pfiife, fascht soviel wie bi de CS.
FREITAG Flagship Store
19 gstapleti Frachtcontainer, über 1'800 Unikat-Täschene us alte Lastwageplane. Und zoberscht e Uussichtsterrasse über Züri West, gratis während de Ladeöffnigsziite. Für Chind: Stäge ufe und de Züg uf de Hardbrugg zueluege.
Gaschthof Falke
Es jahrhundertealts Puurehuus, wo s Dorf Wiedike 1620 als Gricht und Schuel kauft hät. Hüt gits da huusgmachti Rösti und Züri Gschnätzlets. Gartebeiz für 120 Lüüt, im Winter wienachtlich gschmückt.
Gelateria di Berna
Gelato wie ide Italieferie, glernt bi de beschte Gelaterias in Verona. Im Laboratorio am Brupbacherplatz und a wiitere Ort z Züri, zum Biispiel im Frau Gerolds Garte, im Micas Garte und a de Europaallee.
Gessnerallee
S Theaterhuus ide alte Kaserne-Ställ zwüsched Sihl und Schanzegrabe. Freis Theater und Tanz us Züri und us de ganze Welt. Näbedra t Riithalle mit Garte.
Gotthard Bar
Es Traditionslokal vo de Langstrass, ächti Quartierbeiz. Gueti Musig, Live-Konzert und DJs. Am Wuchenänd offe bis em halbi foifi.
Grossmünschter
S Wahrzeiche vo Züri mit de zwei Türm. 187 Stuufe ufe im Karlsturm und du häsch di ganz Altstadt und de See vor dir. Für Chind en Ufstieg wie uf en Bärg.
Gül
Türkischi Chuchi us acht Regione, über offenem Füür, im Holzofe und vom Holzchohlegrill. Da wird teilt, glachet, gässe und trunke. 15 GaultMillau-Pünkt und huusgmachti Baklava.
GUMP
T Summerbeiz am Obere Lette. Füess id Limmat hebe, Grill, Cocktails und vo de Dachterrasse de Schwümmer zueluege. Im Winter Pause oder Iisbade, im Früelig 2027 gahts wieder los.
Hive
Eine vo de etablierteschte Clubs vo Züri West. House, Techno und elektronischi Musig, mit Fokus uf lokali Artists. Tanzt wird bis zum Sunneufgang.
Kino Houdini
Foif chlini, gmüetlichi Kinosääl über de Tramendstation. Mit em Houdinli gits es eiges Chinderkino. Vorher oder nachher en Drink a de Kinobar.
Kafi Dihei
Es Kafi wie ide Grosi ihrer Stube: Blüemlitapete, Porzellan und frischi Blueme. Huusgmachti Chueche und Zmorge bis am Vieri. Chinderwage-tauglich, und de Spielplatz uf de Fritschiwiese isch grad näbedra.
Kasheme
Listening Bar, Kafi und Plattelade in eim. Da lost mer Musig no richtig: Vinyl, gueti Cocktails und ab und zue Gäscht wie Gilles Peterson. Kei Reservatione, eifach verbiicho.
Kauflüüte
Sit über 100 Jahr Kultur und Nachtläbe am Pelikanplatz, 1919 sogar mit Dada-Soirée. Gilt als ältischte Club vo de Schwiiz. Lesige, Comedy und Konzert vo internationale Stars.
KEEN Wellbeing
Sauna, Iisbad und Atemübige bim Viadukt im Chreis 5. Am Wuchenänd Sauna-Socials mit DJ. Heiss, chalt, heiss, und nachher füehlsch di wie neu.
Khouris
Familiechuchi im Seefeld nach de Rezept vo Mama Khouri. Mezze zum Teile, Rotisserie-Güggeli und frischi Falafel a lange Tisch. Am Wuchenänd Chai und Knafeh uf de Terrasse.
Klaus
De Club vo Fründe für Fründe im Chreis 4. Ine chunsch nur als Member oder mit Iiladig, und e VIP-Behandlig gits für niemer. Party vo Dunschtig bis Samschtig ab Mitternacht.
Kronehalle
Sit 1924 am Bellevue, a de Wänd hanged Original vo Chagall, Picasso und Miró. Einigi Künschtler händ mit Bilder zahlt. De Klassiker: Züri Gschnätzlets.
Kunschthuus Züri
S gröschte Kunschtmuseum vo de Schwiiz, mit de gröschte Munch-Sammlig usserhalb vo Norwege. Highlight für Chind: t Liechtwand vo de Pipilotti Rist. Workshops und Füehrige au für di Chline.
Lambada Bar
Schlumi-Bar im Langstrass-Quartier mit Club-Gfüehl. DJs, Lounge und Motto-Party. Kei Dresscode, gmischts Publikum.
Les Halles
Halb Restaurant, halb Feinkostlade, halb Brockehuus, im Züri West sit 1998. De Klassiker: Moules et Frites. Es farbigs Durenand voller Kunscht und Fundstück.
Stadion Letzigrund
Heimstadion vom FCZ und vom GC, Bühni vo Weltklasse Zürich und vo Konzert vo de Rolling Stones bis Beyoncé. Bis über 50'000 Lüüt händ Platz. Mit Stadionfüehrige au für chlini Fans.
Lily's Original
Sit 1999 a de Langstrass, s Original vo allne Lily's. Pan-asiatischi Chuchi, frisch us em Wok über de Flamme. Lange Tisch, schnälle Service.
Longstreet Bar
Kult-Bar a de Langstrass mit hundert Glüehbirne und rote Plüsch-Wänd. Obe en chliine Dancefloor mit Hip-Hop. Eini vo de erschte Adresse vom Langstrasse-Läbe.
Maurice de Mauriac
Zürcher Uhremarke, Atelier und Lade in eim. Da designsch dini eigeni Uhr mit, vom Zifferblatt bis zum Armband. Und am Tisch vo de Familie gits immer en Espresso und e gueti Gschicht.
Micas Garte
De Street-Food-Garte vo Frau Gerold z Altstette: 3'000 m², hängendi Gärte, Dachterrasse und Ständ us aller Welt. Chinderwage-tauglich, mit Pingpong und Jöggeli Chaschte. Vo April bis Oktober, ab 26. März 2027 wieder offe.
Microlino
S Isetta-Revival us de Schwiiz: de elektrischi Microlino. Im Brandstore im Circle am Flughafe chasch en aaluege, konfiguriere und Probefahrt mache. T Micro-Trottis gits au. Und oise Teppich findsch det au (mir chönds au nonig fasse, wie geil das isch).
Migros City
Di gross Migros zmitzt ide Stadt, es paar Schritt vom HB. Frischi Läbesmittel über mehreri Stockwerk. Mit Self-Service-Restaurant für de schnälli Zmittag. Natürli nüt für dich, wänn du es Coop-Chind bisch.
MIKI Ramen
Ächti Ramen mit huusgmachte Nudle und chräftige Brüehe. Am meischte globt: t Tantanmen. Chlii und meischtens voll, also früeh cho.
Monocle Kafi
S Kafi vom Design-Magazin Monocle im Seefeld. Kafi uf de Terrasse mit Gipfeli und japanische Dessert. Im Lade Büecher, Magazin und schöni Sache.
Musigschuel Konservatorium Züri
S Schuelhuus Kanzlei im Chreis 4 isch en Standort vo de Musigschuel Konservatorium Züri. Da lehred Chind und Jugendlichi ihres Instrumänt, und im Pop-, Rock- und Jazz-Bereich proobed Bands i eigete Bandrüüm. Mit über 23'000 Schüeler isch sie di gröscht Musigschuel vo de Schwiiz.
Trattoria Neumarkt
Di Trattoria vom Nenad Mlinarevic im Niederdorf, mit eme verwachsene Garte under alte Böim, eine vo de schönschte vo de Altstadt. Italiänisch trifft Japanisch: Udon Cacio e Pepe, Burrata mit Shiso und Polpette vom japanische Holzchohlegrill.
Kafi Odeon
Jugendstil-Kafihuus am Bellevue sit 1911. Da sind scho de Einstein, de Lenin und de James Joyce gsässe. Vom Gipfeli am Morge bis zum Tatar am Abig.
Olé Olé Bar
Sit über 50 Jahr a de Langstrass, hüt gfüehrt vo drü junge Fraue. Banker, Studis und Quartierlüüt am gliche Tisch. Und t Jukebox spielt t Klassiker.
Open Ride
Indoor Cycling mit Musig, Liecht und Rhythmus. Au für Aafänger: T Coaches nämed di a de Hand, Velo-Schueh und Tüechli gits dezue.
Operehuus Züri
Sit 1891 am Sächsilüüteplatz, s Dihei vom Ballett Zürich. Für Chind gits es Chinderoperorcheschter und Füehrige hinder t Kulisse. Im Summer gratis Ballett für alli.
Orell Füssli Chramhof
Vier Stockwerk mit über 120'000 Büecher, bi de Bahnhofstrass. Mit ere grosse Chinderbuech-Abteilig. De Name gaht zrugg uf 1519, und t Firma druckt sogar t Schwiizer Banknote.
Palais Mascotte
Eine vo de ältischte Clubs vo Züri, sit 1916 im Corso-Huus, t Corso-Schrift hät de Max Bill gstaltet. Da händ scho t Josephine Baker und de Louis Armstrong ufträtte. Sit Früelig 2026 wieder offe als Palais Mascotte.
Palestine Grill
Palästinensischs Street Food a de Langstrass, nach de Rezept vom Mami. Huusgmachti Falafel, Sabich und Shish Taouk, am beschte alles zäme uf em Freedom Plate. Dezue huusgmachti Rose-Limonade.
Piccolo Giardino
Quartierbar am Schöneggplatz mit eme gar nöd so chliine Garte. Eifach, unkompliziert und mega beliebt. Am Sunntigabig luegt mer zäme Tatort.
Plaza
Im Art-déco-Kino us em 1924, gformt wie es Stuck Chueche. Konzert vo Rock bis Hip-Hop und Motto-Party. Obe en farbige 80er-Dancefloor.
Remise Rosa
Stadtgarte, Quartierkantine und Kulturort uf em alte Güeterbahnhof-Areal. Mit Spielplatz und jede Samschtig am Zwei de Fuchsbau-Kids-Workshop für Chind und Eltere. Im Winter Fondue im Fuchsbau.
Rimini Bar
Im Holz-Badhuus am Schanzegrabe vo 1864. A schöne Summerabig wird t Männerbadi zur Rimini Bar für alli. Chüssi, Liegestüel und Spiessli vom Grill, direkt am Wasser.
Roland
Es Kino sit 1913, t Lüchtschrift ROLAND isch es Wahrzeiche vo de Langstrass. Im Winter ab und zue Pop-up-Club für elektronischi Musig. Es Stuck Langstrass-Gschicht.
Roti Fabrik
Alti Siidefabrik us rotem Backstei direkt am See z Wollishofe. Sit 1980 Kulturzentrum, wo scho Nirvana gspielt händ. Mit Restaurant Ziegel oh Lac und Seeblick.
Rots Schloss
Es Schloss wie a de Loire, aber am Zürisee, baut 1891 bis 1893. Früener Luxuswohnige mit Seesicht, hüt vor allem Büro. Am schönschte bim Spaziere uf em Quai.
Rundfunk.fm
Im Summer sändet s Radio live us em Innehof vom Landesmuseum. DJs, Food-Ständ und Glace vo de Gelateria di Berna zwüsched alte Muure. Sit über 20 Jahr de Summer-Treffpunkt bim HB.
Sächsilüüte
S Früeligsfescht vo Züri im April. Am Sunntig laufed bis 3'000 Chind im Chinderumzug mit. Am Mäntig am Sächsi brännt de Böögg, und je schnäller de Chopf explodiert, desto schöner wird de Summer.
Samigo Amusement
Restaurant, Show, Sport und Party direkt am See. Uf em Dach en Sportplatz, im Winter Lucha-Libre-Shows und am Sunntig Brunch mit Pancakes. T Pizza chunnt im Basketball-Karton.
Santa Lucia Niederdorf
Läbhafti Pizzeria zmitzt im Niederdorf, t Pizze chömed us em Holzofe. De Huus-Favorit: t Pizza Michelangelo. Perfekt für e grossi Rundi.
Schnupf
Früener Kantine für t Iisebähnler, hüt gmüetlichs Bistro ide Nebegass vo de Langstrass. De Klassiker: Steak Frites mit huusgmachter Béarnaise, Pommes zum Nachschöpfe. Im Summer Garte grad näbe de Gleis.
Sihlpost
S Wahrzeiche vo de Europaallee mit em Uhreturm, baut 1929. Bis hüt t Hauptpost vo Züri. Und es hät e öffentlichi Dachterrasse.
Spielchischte
Schwiizer Familie-Spielwarelade sit rund 40 Jahr. Regal voll mit Lego, Playmobil, Holzspielzüüg und Plüschtier. Mit Beratig und Spielzüüg vo Schwiizer Marke.
Confiserie Sprüngli
Sit 1859 am Paradeplatz und sit Generatione de Treffpunkt vo Züri. Berüehmt für t Luxemburgerli. Im erschte Stock s Kafi mit Blick uf de Paradeplatz.
Stadtpolizei Züri
Wer hätt das dänkt: Im Iigang vo de Stadtpolizei hät de Augusto Giacometti di schönscht Halle vo Züri gmalt, t Blüemlihalle. Mittwuch bis Fritig vo 14 bis 17 Uhr gratis zum Aaluege, ohni Aamäldig.
Stereo Bar
Hi-Fi-Listening-Bar im Chreis 4, wie in Japan. Vintage-Luutsprecher, Vinyl und Cocktails vom Fass. Spöter am Abig füllt sich de chlii Dancefloor.
Sterne Grill
Sit 1963 t Wurscht vo Züri: St. Galler Bratwurscht mit Bürli und em tüüflisch scharfe Sterne-Senf. Wers gmüetlicher will: s OBEN im erschte Stock mit Blick uf de Bellevue.
Studio
Restaurant, Bar und Club grad bi de Hardbrugg. Japanischi Small Plates wie Gyoza, Katsu Sando und Matcha-Tiramisu. Am Mittwuch Live-Musig, am Wuchenänd volle Dancefloor.
Supermarket
Eine vo de bekanntischte Clubs vo Züri, sit 1998 in Züri West. Techno und House, tanzt wird bis in Morge ine.
ViCAFE
Am Tag eis vo de beschte Kafi vo Züri West, vo de Zürcher Kafimarke ViCAFE. Espresso, Flat White und es Gipfeli für underwegs.
Swiss Casinos Züri
S gröschte Casino vo de Schwiiz mit Las-Vegas-Interieur. Roulette, Blackjack, Poker und hundert Automate.
Swiss Life Arena
S Dihei vo de ZSC Lions sit 2022 z Altstette. Bis 12'000 Fans und steili Tribüne für richtige Hexechessel-Stimmig.
Tenz Momo
Alles dreht sich um Momos, di tibetische Teigtäschli, vo Hand gfaltet. Agfange 2014 am erschte Street Food Festival vo Züri. Mit Fleisch, vegetarisch oder vegan, und huusgmachter Chili-Sauce.
Tonhalle Züri
Iigweiht 1895, de Johannes Brahms hät s Eröffnigskonzert sälber dirigiert. De Grossi Saal hät eini vo de beschte Akustike vo de Welt. S Dihei vom Tonhalle-Orcheschter.
Ristorante Toscano
Toskanischi Chuchi im Puls 5 im Züri West. Grossi Terrasse für sunnigi Zmittag. Bekannt für Fisch und Pappardelle mit Wildschwiiragout.
Trattoria Sempre
Es Stückli Italie im Niederdorf, mit Schinke a de Decki und Fussballtrikot a de Wänd. Alles huusgmacht, vo Polpette bis Fritto Misto. Luut und fröhlich wie e grossi italiänischi Familie.
Üetliberg
De Huusbärg vo Züri, mit Blick über Stadt, See und Alpe. Mit de S10 in rund 25 Minute vom HB ufe. Für Familie: de Planetewäg bis uf t Felsenegg und im Winter schlittle.
Flussbadi Undere Lette
S ältischte Flussbad vo Züri, Iitritt gratis. Grossi lönd sich vo de Limmat träge, di Chline plansched im Chinderbecki und uf em Spielplatz. Im Summer Openair-Kino.
Uni Züri
Di gröscht Uni vo de Schwiiz, de Turm mit de grüene Kupple gseht mer vo überall. Im Iigang hängt s Doktordiplom vom Einstein.
Urbansurf
Surfe zmitzt ide Stadt, uf ere stehende Wälle grad bi de Hardbrugg. Aafänger sind willkomme, und es gits Kids-Sessions. Wer nöd surft, luegt vo de Bar zue.
Seebadi Utoquai
Baut 1890 und di erscht Badi vo Züri, wo Manne und Fraue zäme händ döfe schwümme. Sprungbrätt, Flöss im See und zwei Nichtschwümmerbecki. Zmitzt a de Seepromenade.
Vergani
Familiebetrieb sit 1892, hüt ide foifte Generation. Am Löwenplatz gits Aperitivo zmitzt ide Stadt, mit über 300 italiänische Wii und de gröschte Grappa-Uswahl vo de Schwiiz. S Stammhuus staht z Wiedike a de Zentralstrasse 141.
Volkshuus
Sit 1910 es Huus für t Lüüt am Helvetiaplatz. Foif Sääl für Konzert, Party und Versammlige. Im Erdgschoss s Restaurant Volkshuus.
Schutz & Rettig, Wach Süd
T Hauptwach vo de Zürcher Berufsfüürwehr, 1937 baut und hüt es Kulturdenkmal. Rund 220 Profis und 400 Freiwilligi sorged für Sicherheit. Und jedes Chind winkt, wänn s rote Auto usefahrt.
Werner's Head Shop
Es Stück Langstrass: Raucherzuebehör, Shisha und CBD, mit fründlicher und kompetenter Beratig. #ufklärig
Widder Hotel
Mehreri mittelalterlichi Altstadthüüser, zämegfüegt zu eim Hotel. Keis Zimmer gliich wie s andere. T Widder Bar isch e Zürcher Jazz-Institution.
Zoo Züri
Rund 6'000 Tier uf em Züribärg, offe jede Tag im Jahr. Im Masoala-Regewald turned t Lemure frei ume, ide Lewa-Savanne Giraffe und Nashörner. Im Zoolino dörfed t Chind streichle und füettere.
Zukki
Zwänzg Jahr lang de Techno-Club im Chreis 4 gsi, vo de Fans liebevoll Zukki gnännt. Im März 2025 isch nach ere 24-Stund-Party Schluss gsi. De Gorilla staht jetzt im Landesmuseum. Gschlossä, aber für immer i oisne Herze.
Züri HB
De gröscht Bahnhof vo de Schwiiz mit rund 3'000 Züg am Tag. Ide Halle schwebt de farbig Schutzengel vo de Niki de Saint Phalle. Im Winter mit Wienachtsmärt und Iisfeld.
Züüghuuschäller
1487 als Züüghuus baut, de Legände nach isch da am Wilhelm Tell sini Armbruscht usegäh worde. Sit 1926 e Bierhalle under riesige Holzbalke. Züri Gschnätzlets, Cordon bleu und grossi Bratwürscht.
